Beams Shopdrawing

Beams Shopdrawing

بسم الله الرحمن الرحيم
السلام عليكم و رحمة الله و بركاته 

تفريد حديد تسليح الكمرات (Beams Shop Drawing) :-

- تعالي نقسم تسليح الكمرات إلي جزئين رئيسين و هما تسليح الكمرات في الـ Cross Section و تسليح الكمرات في الـ Elevation

- أولا : تسليح الكمرات في الـ Cross Section  :

1- التسليح الرئيسى (Main Reinforcement)
- و هو التسليح اللي بحطه علشان يقاوم العزوم أياً كانت هي عزوم سفلية أم عزوم علوية فبالتالي عندى حديد تسليح رئيسي سفلي ده اللي بيقاوم العزوم السفلية اللي هي بتكون في منتصف البحر
و عندى حديد تسليح رئيسي علوي ده اللي بيقاوم العزوم العلوية اللى هي فوق الأعمدة
- أقل قطر للتسليح الرئيسي هو 12 مم
- أقل عدد للتسليح الرئيسي هو 2 سيخ
- أكبر عدد أسياخ في الصف الواحد للتسليح الرئيسي بيعتمد علي قطر السيخ و عرض الكمرة و مقاس الغطاء الخرسانى و مقاس الركام اللي موجود في الخرسانة و ده بكل سهولة أقدر أحسبه من المعادلة الشهيرة n= (b-25)/(Ø+25) حيث n هو أقصي عدد من الأسياخ في الصف الواحد و الناتج اللي بيطلع بقربه لأقرب رقم صحيح بالناقص
- أكبر عدد من الصفوف هو 3 صفوف علشان الحديد أصلا أنا بحطه علشان يقاوم شد فلو الحديد إترفع لفوق مش هيقابل الـ Max Tension و بالتالي هيطلع لمنطقة شد قليلة و ممكن لو عمق الكمرة قليل يطلع لمنطقة مفيهاش شد ده لو أنا زودت عدد الصفوف عن 3
- يفضل إني أفصل بين الصفوف بسيخ بالعرض يسمي Spacer و بيكون قطره نفس قطر التسليح الرئيسي
- لما نيجى نرص الحديد في القطاع في الصفوف المختلفة لازم علي الأقل يبقي عندى سيخ في كل ركن و يفضل تكون الأسياخ في الصفوف السفلية أكبر من أو يساوى عدد الأسياخ في الصفوف العلوية علشان ميحصلش تعشيش و يفضل تكون الأسياخ العلوية علي نفس Center Line الأسياخ السفلية و يفضل يكون توزيع الأسياخ في القطاع بالتماثل
- من الممكن إنى أستخدم قطرين مختلفين في التسليح الرئيسي و لكن يفضل أن يكونوا قطرين متتالين في الجدول و أن يكون توزيع الأقطار الكبيرة في الأركان

2- حديد تعليق الكانات (Stirrup Hangers) :
- ده حديد ثانوى بحطه في المناطق اللي مش موجود فيها تسليح رئيسي و وظيفته هي تعليق الكانات عليه
- من الممكن إستخدام حديد تعليق الكانات في مقاومة العزوم الطرفية الصغيرة الناتجة من إرتكاز الكمرة علي العمود (Wl2/24)
- قيمته تكون 2Ø12 أو (0.10 – 0.20 AS) أيهما أكبر

3- حديد المقاوم للضغط (Compressive Steel As’)
- و ده بستخدمه لما يكون القطاع الخرساني Unsafe و محتاج أكبر أبعاد القطاع و لكن المعماري رافض ساعتها ممكن أسيب القطاع الخرسانى زى ماهو و أستخدم حديد يساعد الخرسانة في مقاومة الضغط
- الـ Compressive Steel بحتاجه في الـ R-Section بس و مش هيفيدنى في حاجة في الـ T-Section و الـ L-Section علشان هنا البلاطة بتشارك الكمرة في مقاومة الضغط

4- الحديد المقاوم للإنكماش (Shrinkage Bars) :
- بستخدمه لما يكون سمك الكمرة أكبر من 70 سم
- و لكن عمليا بستخدمه لما سقوط الكمرة (سمك الكمرة – سمك البلاطة) يكون أكبر من 60 سم
- تسليحه بيكون 2Ø12 أو ممكن 2Ø10
- بستخدمه علي مسافات لا تزيد عن 30 سم
- يسمى في الموقع بالبرندات

5- الكانات (Stirrups) :
- بنستخدم الكانات في مقاومة الـ Shear Stresses اللي هى الـ Shear و الـ Torsion
- علشان كدة هنلاقي إننا في الغالب بنكثف الكانات عند وش العمود علشان هي دى اللي هتقاوم الـ Max-Shear
- قفل الكانة يفضل أن يكون في منطقة الضغط و أن يكون تبادلي ( وفي أغلب المواقع الكلام ده مبيتعملش)

ثانيا : تسليح الكمرات في الـ Elevation :
عندنا طريقتين لتفريد حديد الكمرات في الـ Elevation
أول طريقة هي تفريد حديد الكمرات بإستخدام أسياخ مستقيمة
ثانى طريقة هي تفريد حديد الكمرات بإستخدام أسياخ مكسحة

تفريد حديد الكمرات بإستخدام أسياخ مستقيمة
- الموضوع ببساطة شديدة إني برسم شكل الـ Bending Moment للكمرة و بناءً علي منطقة الشد بحط حديد
في الكمرات الـ Simple بيكون عندى المومنت تحت في نصف الـ Span و بيكون عندى شوية مومنت صغيرين عند الأعمدة اللي هي الـ Wl2/24
- المومنت السفلي بيكون أقصي ما يمكن في منتصف الكمرة و كل لما أقرب للعمود ألاقي المومنت بيقل فبالتالي أنا محتاج أكبر حديد في النصف و ممكن في منطقة العمود أوفر في الحديد السفلي شوية
- الكود المصري بيقول : إنه يجب أن يستمر علي الأقل ثلث التسليح المقاوم للعزوم الموجبة إلي الركائز و ممكن أوفر في الثلثين
- و لكن في الغالب أنا بكمل النصف و بوفر النصف
- يعنى لو عندى كمرة تسليحها 6Ø16 بخلي 3 أسياخ مستمرين لحد الأعمدة و 3 أسياخ بوفر فيهم شوية

1- الكمرة Simple :
- نصف الحديد السفلي مستمر لحد الأعمدة
- نصف الحديد السفلي بيقف علي مسافة (0.10L)
- الحديد العلوى المقاوم للـ (Wl2/24) بيقف علي مسافة (0.20L)
- الجزء العلوي المتبقي بحط فيه حديد تعليق كانات بيتداخل مع الحديد العلوي مسافة صغيرة 25 أو 40 سم ( مش Ld)

2- الكمرة المستمرة Two Span
- نصف الحديد السفلي مستمر لحد الأعمدة
- نصف الحديد السفلي بيقف علي مسافة (0.10L) من ناحية الهواء  و علي مسافة (0.20L) من ناحية الكمرة
- الحديد العلوى المقاوم للـ (Wl2/24) بيقف علي مسافة (0.20L)
- الحديد العلوى المقاوم للعزوم الرئيسية يمتد مسافة (X/3) يمين و شمال حيث (X) هي طول البحر الأكبر
- الجزء العلوي المتبقي بحط فيه حديد تعليق كانات بيتداخل مع الحديد العلوي مسافة صغيرة 25 أو 40 سم ( مش Ld) 

3- الكمرة المستمرة More Than Two Span
- نصف الحديد السفلي مستمر لحد الأعمدة
- نصف الحديد السفلي بيقف علي مسافة (0.10L) من ناحية الهواء  و علي مسافة (0.20L) من ناحية الكمرة
- الحديد العلوى المقاوم للـ (Wl2/24) بيقف علي مسافة (0.20L)
- الحديد العلوى المقاوم للعزوم الرئيسية يمتد مسافة (X/4) يمين و شمال حيث (X) هي طول البحر الأكبر
- الجزء العلوي المتبقي بحط فيه حديد تعليق كانات بيتداخل مع الحديد العلوي مسافة صغيرة 25 أو 40 سم ( مش Ld)

تفريد حديد الكمرات بإستخدام أسياخ مكسحة
- الفكرة ببساطة هى إني باخد الحديد السفلي اللي عند الأعمدة اللي ملهوش فايدة و بخليه حديد علوي لأن في المنطقة دى عندى عزوم علوية و كمان بستفيد من التكسيحة دى في مقاومة الشير اللي جاي علي الكمرة
- زاوية التكسيحة بتكون علي زاوية 45 أو 60
- إرتفاع التكسيحة = عمق الكمرة – 2 الغطاء الخرسانى

1- الكمرة Simple :
- نصف الحديد السفلي مستمر لحد الأعمدة عدل
- نصف الحديد السفلي بيتكسح عند الـ (L/7) و يتحول إلي حديد علوي عند الأعمدة
- الجزء العلوي المتبقي حديد تعليق كانات

2- الكمرة المستمرة Two Span
- نصف الحديد السفلي مستمر لحد الأعمدة عدل
- نصف الحديد السفلي بيتكسح عند الـ (L/7) و يتحول إلي حديد علوي عند الأعمدة الطرفية و يتكسح عند (X/4) و يرمي في البحر اللي جنبه مسافة (X/3) في الأعمدة الوسطية حيث (X) هي الأكبر من البحرين
- الجزء العلوي المتبقي حديد تعليق كانات

3- الكمرة المستمرة More Than Two Span
- نصف الحديد السفلي مستمر لحد الأعمدة عدل
- نصف الحديد السفلي بيتكسح عند الـ (L/7) و يتحول إلي حديد علوي عند الأعمدة الطرفية و يتكسح عند (X/5) و يرمي في البحر اللي جنبه مسافة (X/4) في الأعمدة الوسطية حيث (X) هي الأكبر من البحرين
- الجزء العلوي المتبقي حديد تعليق كانات

إن شاء الله في البوست اللي جاي "خطوات تصميم و نمذجة الكمرات"